കൊച്ചി: കേരളത്തില് പണിമുടക്കിനിടെ ഉണ്ടായ അനിഷ്ട സംഭവങ്ങള് ന്യായീകരിച്ച് സിഐടിയു ജനറല് സെക്രട്ടറി എളമരം കരീം. ചക്ക മുറിക്കുമ്പോള് ഒരു കുരു എങ്കിലും മുറിയുമെന്ന് പറഞ്ഞാണ് കൊച്ചിയില് പ്രതിഷേധ ജാഥ ഉദ്ഘാടനം ചെയ്ത് സംസാരിക്കവെ എളമരം കരീം പണിമുടക്ക് പ്രതിഷേധങ്ങളെ ന്യായീകരിച്ചത്.
ബലപ്രയോഗം പാടില്ലെന്ന് പറഞ്ഞിരുന്നുവെന്ന് എളമരം കരീം വ്യക്തമാക്കി. എല്ലാവരും പണിമുടക്കുമ്പോള് ചില കരിങ്കാലികള് ഉണ്ടാവുമെന്നും ജോലിക്ക് എത്തിയവരെ പരിഹസിച്ച് കരീം പറഞ്ഞു.
പണിമുടക്ക് ദിവസം എവിടെയെങ്കിലും എന്തെങ്കിലും അനിഷ്ട സംഭവങ്ങള് ഉണ്ടോ എന്ന് മാത്രമാണ് ചിലയാളുകള് അന്വേഷിച്ചു നടക്കുന്നത്. കൊടുവാളു കൊണ്ട് വെട്ടി ഒരു ചക്ക മുറിക്കുമ്പോള് അതില് ഒരു കുരുവിന് എങ്കിലും പരിക്ക് പറ്റില്ലേ. കല്പ്പിച്ചു കൂട്ടി ചെയ്യുന്നതാണോ.
അതുപോലെ ഒരു മഹാസമ്മേളനം നടക്കുമ്പോള് റോഡ് ഗതാഗതം തടസപ്പെട്ട് യാത്ര മുടങ്ങുന്നത് കല്പ്പിച്ചു കൂട്ടി ചെയ്യുന്നതാണോ. ഇതൊക്കെയാണോ ഒരു സമരത്തെ കുറിച്ച് പറയാന് ഹൈലൈറ്റ് ചെയ്യേണ്ടത്. തൊഴിലാളി പക്ഷം പറയാന് തൊഴിലാളികള് തന്നെ ഒരുമിച്ച് നില്ക്കണം - എന്ന് എളമരം കരീം പറഞ്ഞു.
അതേസമയം, കൊച്ചിയിലും കേരളത്തില് പലയിടങ്ങളിലും സമരാനുകൂലികള് വാഹനം തടയുകയും ബലപ്രയോഗങ്ങളും നടത്തുകയും ചെയ്യുന്നുണ്ട്. കൊച്ചിയില് കാക്കനാട് ടാക്സി കാര് സമരാനുകൂലികള് തടഞ്ഞു. പോലീസ് എത്തിയാണ് കാര് യാത്ര തുടര്ന്നത്. അങ്കമാലിയില് കെഎസ്ആര്ടിസി സൂപ്പര്ഫാസ്റ്റ് ബസ് തടഞ്ഞതോടെ ഡിപ്പോയിലേക്ക് തന്നെ മാറ്റി.
E-paper LOGIN
LOGIN
